﷽

Në andërr çdo natë unë t'pres

Të vish të ma shuash këtë zjarr

Dhe vdes kur zgjohem n'mëngjes

Se larg unë të kam, shumë larg.

A thua veç andërr ishe ti,

Ike si mos t'kishe qenë

Çdo natë unë po lus Perëndinë

E shpresë kam që me ty do të jem.

Shumë po lëngon shpirti im,

Ty po t'kërkon plot me mall,

A thua për mua ka gëzim

Prapë t'i shoh sytë plot zjarr!

Eja prapë eja si dikur,

Pranverën sillja shpirtit tim,

Ishe e do t'jesh përgjithmonë

Për mua i vetmi shërim.

T'i shoh unë syt' e tu të zi,

Aty ku shihja gjithësinë

Eja prapë eja ti moj vashë

Dhe falma mua dashurinë.

A thua do jemi bashkë,

N'këtë botë ndonjëherë ne të dy,

A thua ishte mirazh

Kur shihja syt' e zi.

Për fund unë ty po të them,

Të dua si ditën e parë,

Me ty unë dua të jem,

Askush me ty s'ka të ngjarë.

Eja dhe sot si atëherë

Dhe s'bashku jetën ta çojmë

Pa ty çdo ditë unë po vdes,

Eja së bashku t'jetojmë!

Doja t'jetoja me ty

E të vdisnim ne bashkë

Ti e vetmja dashuri

Ishe prej se të pashë.

I lutem unë t'madhit Zot

Me ty një ditë prapë të jem

N'mos u bashkofshim n'këtë botë

Veç mërzi gjithmonë do kem.

Ta puth unë frymën nga larg

Edhe pse afër s'të kam

Me ty unë jam përgjithmonë

Dhe pse fati na ndanë!