﷽

Bismilahi Rrahmâni Rrahîm 

N’kët tokë i kena gjanat

qi e bajnë jetën të vlefshme me u jetu:

ngurrimin e prillit,

aromën e bukës në pikë sabahu,

mendimin e nji grueje mbi burrat,

veprat e Eskilit,

fillimin e dashunisë,

barin në nji gur,

nanat qi jetojnë në pshertimë të fyellit,

edhe frigën e pushtuesit prej kujtimeve.

N’kët tokë i kena gjanat

qi e bajnë jetën të vlefshme me u jetu:

ditët e fundit të shtatorit,

nji grue qi i mbanë kajsiat e saj të pjekuna mbas të katërdhetave,

orën e rrezeve të diellit në qeli,

nji re qi pasqyron nji dyndje krijesash,

rrahjet e shuplakave të njerëzve

për ata qi i dalin vdekjes përballë tuj qeshë,

e frigën e tiranit ndaj kangëve.

N’kët tokë i kena gjanat

qi e bajnë jetën të vlefshme me u jetu:

Zojën Tokë,

nanën e tana fillimeve e përfundimeve.

Ajo e ka pas pasë emrin Palestinë,

masnej emri i saj prapë u ba Palestinë.

Zoja jem!

Për shkak se je Zoja jem,

e kom hak jetën.

• Shqipnuem prej përkthimit të Munir Akash-it dhe Carolyn Forché-së

• Përktheu: Trandofilishta (Tetor, 2023)

➜